Акафист Царственной Седмерице (царю-искупителю России Николаю, царице-мученице Александре, царевичу-мученику Алексию, царевнам-мученицам Ольге, Татиане, Марии и Анастасии)
Кондак 1
Избранная седмерице, во еже о ней хвалити Бога во вся дни жизни нашея, святии мученицы царственнии, умолити Судию грознаго и неумытнаго, грядуща судити живым и мертвым, да седмижды седмдесять ослабит, оставит всем поющим вам: Радуйся, радосте седмицветная, завете спасения русскаго в покаянии.
Икос 1
Ангели Божии есте, ускоряющие исхождение наше от котлов египетских, от радостей потопных, от рожец свиний: о святии мученицы рода царскаго: послани ныне есте роду нашему Царство приблизившееся возвестити, от покаяния приемля ны во своя си, Русь Святую Небесную, идеже уповаем пети о вас:
Радуйся, царю Николае, Христом Богом царствующий; радуйся, имже отечества Небеснаго и земнаго сподобляемся.
Радуйся, милосердая царице Александро Новая, страданьми твоими струпы греховные наши обязующая; радуйся, царевичу Алексие, защитниче теплый целомудрия.
Радуйся, мудрая дево царевно Ольго, невеста святая Руси Святой; радуйся, мудрая дево царевно Татиано, погубившая душу, обретшая ю.
Радуйся, мудрая дево царевно Марие, мироносице новая повапленным нашим сердцам; радуйся, мудрая дево царевно Анастасие, веселие вечное над главами нашими.
Радуйся, седмерице труб рожаных, вострубите, во еже падет вознесенная наша гордыня.
Кондак 2
Видящи святые мерзость запустения на месте Руси Святой вящше неже седмдесят лет, себе же самех поносимых, иждиваемых, всяцем злым глаголом реченных ради Христа даже до днесь, Господи: вопиют Спасу: не просим Тебе седмь раз простити ихже не ведают, что творят, но якоже рекл еси Петру, да и тии поют: Аллилуиа.
Икос 2
Разум недоразумеваемый разумети ересь саддукейская аще ищеши поныне, главному догмату православия не верующи, зри убо тацех седмь, кийждо от них есть венец Руси, законные бо обладатели земли и народа суть, обаче блудодействова земля и народ от Закона Божия: ащи ли гладствовавши в себе приидет, сице зовущи:
Радуйся, царю Николае, царскую диадиму мученическим венцем уяснивый; радуйся, воином Христовым до гроба бывый.
Радуйся, царице Александро Новая, мудрость любовию о Христе свидетельствуяй; радуйся, царевичу Алексие, иже яко овча на заколение ведеся.
Радуйся, царевно Ольго, в годину буих мрачных дней дивно процветшая; радуйся, царевно Татиано, матере твоея неизреченная таиннице.
Радуйся, царевно Марие, бдящая на молитве за нощь России несветлую; радуйся, царевно Анастасие, радосте ангелов.
Радуйся, седмь, имущие обладати Россиею, иже яко ангели на Небесех, бывшие ей на земли.
Кондак 3
Сила Вышняго осени тогда яко едиными усты глаголати царственных мучеников: Русские есмы, и хотением восхотели есмы умрети в России, егда самое имя сие постыдным непщуется даже до днесь в стране нашей: якоже седмь убо зерен, пад в землю нашу, седмь тучных класов питающих ны паче неже седмдесять безплодных лет, подали есте нам, поющим: Аллилуиа.
Икос 3
Имущи Богоприятные камени во время оно Господь, языцы, во тьме и сени смертной сидящии, чада Аврааму соделал есть: обаче и самое камение разседеся, не терпя страданий Христовых: да не возглаголем ныне: чада есмы отца всех русских, отца имамы царя Николая, аще не творим плод достоин покаяния, поюще:
Радуйся, царю Николае, готовое наше покаяние; радуйся, каменныя сердца наша пременяяй на плотяныя.
Радуйся, царице Александро Новая, на царстве юродою сущая; радуйся, царевичу Алексие, всесожжение за грехи народа твоего.
Радуйся, царевно Ольго, рай изгибшего отечества нашего; Радуйся, царевно Татиано, радующаяся, идеже мы ропщем.
Радуйся, царевно Марие, любящая любвеоставленных; радуйся, царевно Анастасие, радосте безрадостных.
Радуйся, имиже, аще седмищи на день согрешаем, седмищи на день обращающихся приемлет ны Господь.
Кондак 4
Бурю внутрь имея помышлений сумнительных о царственных мучениках некий списатель житий святых, узрев седмь струй мира точащу икону царя Николая, принесе теплое покаяние: прочее слышим евангельский глас: и аще кто от мертвых воскреснет, не имут веры. Мы же царственным мироточцам поем: Аллилуиа.
Икос 4
Слышаша архипастырие соборнии перваго среди равных, глаголюща: аще кто непщует нуждно быти царю прославлену, да потщится возстати: вси убо последоваша возставшу ему: Полнотою Церкви Небесной и Земной совершившуся, вси поют мучеником царственным:
Радуйся, царю Николае, послушания отча никогдаже бежавый; радуйся, волю Отца Небеснаго всегда разумевый.
Радуйся, царице Александро Новая, правды токмо Христовой алкавшая; радуйся, царевичу Алексие, отроков о чистоте непреклонная дерзосте.
Радуйся, царевно Ольго, боящаяся огорчити отца огорчением ближних его; радуйся, царевно Татиано, не испытующая, но испытуемая.
Радуйся, царевно Марие, яко и ты еси во бранех помощнице нам; радуйся, царевно Анастасие, радосте целая отроковиц невестных.
Радуйтеся, в Церкви Седмисоборней, собирая овцы Единому Пастырю.
Кондак 5
Боготечнии звезды есте, звезде Вифлеемстей подобяся: седмерицею умножая светолитие над хладным и темным вертепом, иже ныне весь мир есть: аще ли не паки Грядущему со славою сияете, пристрашно вопиющи: Се Жених грядет, Аллилуиа.
Икос 5
Видяще отроцы седмь во Эфесе, иже о Максимилиане, посмеявающиеся ереси саддукейской о еже не быти воскресению: аще несть воскресения, вся дозволена суть: узрим же и седмь царственных, ратуемых даже доныне: брань же сия истинное есть уверение вечныя жизни их во Христе: да не услышим, иже все слышат не почитающие царей в Неделю Православия, да присно поем о царех:
Радуйся, царю Николае, пастырю добрый народа русскаго; радуйся, имже открываются помышления многих сердец.
Радуйся, царице Александро Новая, семей во Христе охранительнице; радуйся, царевичу Алексие, возсиявый во время посещения твоего.
Радуйся, царевно Ольго, ведущая матернее в девстве твоем; радуйся, царевно Татиано, послушным духовный слух отверзающая.
Радуйся, царевно Марие, изми нозе мои от поползновения; радуйся, царевно Анастасие, радосте всех поющих тебе.
Радуйтеся, иже яко седмь агнцев непорочных единолетных, всесожжение Богу приятно устройте души наша.
Кондак 6
Проповедницы Богоноснии бывше седмь седмериц лет святии царственнии мученицы: вами бо вопиял есть Спас Всемилостивый: милости хощу, а не жертвы: беззаконне миловали сирот и вдовиц чрез все житие ваше: юбилейному году наставшу, беззаконне субботствующих милуете страшно, их жертвоприношению соизволяя, аще ли ни останок покается, вопиюще о царех Богу: Аллилуиа.
Икос 6
Возсиявый во Египте новом просвещение тьмы, паки иже о Иосифе изобразуеши нам: седмью хлебами лепоты дивной насыщаеши тысящи гобзующих: яко седмью тучными годами избыточествуеши седмидесяти летом безплодным: в дому Отца моего наемники колицыми избыточествуют хлебы: призывая вопити нас, гладствующих на чуждей стране, да воспоем седмерице царственней:
Радуйся, царю Николае, столпе веры православныя; радуйся, твердое Церкве ограждение.
Радуйся, царице Александро Новая, сестра милосердная народа твоего; радуйся, Алексие, новый царевич углический.
Радуйся, царевно Ольго, радующаяся воле отчей; радуйся, царевно Татиано, правило послушания.
Радуйся, царевно Марие, жажду Небесных даруй нам; радуйся, царевно Анастасие, радосте жизни во Христе.
Радуйся, седмеричное погружение нееманово, очищение неисцешьной гордыни нашей.
Кондак 7
Хотяй всем человеком спастися и в разум истины приити, многочастне и многообразне глаголет нам Бог мучениками царственными: аще восхощем молитися царю Николаю, всей семье молимся, седмерицею на всяк день хваляще Господа: аще ли прильнем к милосердой царице, абие седмь помазаний имамы духовных: ко царевичу ли возопиим, зрим целокупно седмисвечник пресветлый: плачем ли Ольге, все убо седмь звезд боготечных кротце сияют нам: смиряем егда себе пред Татианою: седмь даров Дух Святый изливает на нас: бодрствуем ли со Мариею, шесть убо дний творим волю Божию, да в седмый Его покой обрящем: жительствуем ли в Анастасии, истинно субботствуем воскресно: малая церковь есте, мученицы царственнии, седмотаинственно благодатствуя всех, поющих о вас: Аллилуиа.
Икос 7
Новые водоносы уставляет Жених Небесный на браке Руси Святой: егда людие русские, упившиеся благоденственным мирным житием, здравием же и спасением, и во всем благим поспешением Божиим, благодарни быти не восхотели суть, вращшася, псом подобно, на язычество свое: тогда седмь убо водоносов исполнил есть Христос даров благодати и истины, седмь святых цартсвнных мучеников, дивящимся всем, како сберег Сый доброе сие вино до последних дний, в них же упоеваемии, поем:
Радуйся, царю Николае, кротце вся простивый; радуйся, землю Русскую навеки наследовавый.
Радуйся, царице Александро Новая, яко тобою спасутся тысящи; радуйся, царевичу Алексие, источниче благодати.
Радуйся, царевно Ольго, словесы чисты Бога о России молящая; радуйся, царевно Татиано, вкушение сладости затворения.
Радуйся, царевно Марие, точащая воду животную из камене; радуйся, царевно Анастасие, невинно страждущих Пасце причащающая.
Радуйся, благодать седмеричная, иже безплодны творит отцы множества.
Кондак 8
Странное о царственных мученицех видяще, яко едину имели велию скорбь, егда разлучатися семье: убоимся Глаголющего: иже Бог сочета, человецы да не разлучат: возопиим Сочетателю всяческих о Семье во Христе: Аллилуиа.
Икос 8
Весь бе в нижних, Христу последуя, мученик святый царь Николай, даже до ада малое стадо с собою ведый: никогдаже стремился властвовати, обаче двадесять и три года твердо кормил есть кораблец русской державы: веруя в харизму свою, смирился до умаления славы ея: любящий жену и детей, монах был готов стати: наконец же отречение России любовию покрыл есть, и ныне ведеши семью на заколение, в снедь алчущим любве желая принестися, пепел падений наших растворяя вином неотступнаго отцовства твоего, плачущим и рыдающим нам сице:
Радуйся, царю Николае, всякую болезнь врачуяй; радуйся, из тьмы кромешной и топи изводяй.
Радуйся, царице Александро Новая, упокоение страждущих; радуйся, царевичу Алексие, веселие безпомощных.
Радуйся, царевно Ольго, утешающая отечестволюбцев; радуйся, царевно Татиано, давидствуящая противу голиафа западнаго.
Радуйся, царевно Марие, неверных гласа совестнаго слышание; радуйся, царевно Анастасие, радосте, смерть попирающая.
Радуйся, маккавеи новые: аще ли в седмих покаемся.
Кондак 9
Всякое естество ангельское удивися, зряще таинство седми звезд, иже ангели церкви и земли русския, полноту благодати изливая коемуждо кающемуся сердцу, иже милися плачет: Аллилуиа.
Икос 9
Ветия многовещанныя двадесять и три степени низу непщуют царствие ваше: мы же схождение страшное празднуем, царственный воистинну убо кенозис христоподражательный, паки зряще лествицу иаковлю, и седмь убо ангелы Божии, иже сходят по ней к немощным нашим мольбам, и возносят сии ко престолу Славы, всем поющим о них:
Радуйся, царю Николае, новыя страны народом русским населивый; радуйся, яко сей народ твой злобой немстующих победил есть.
Радуйся, царице Александро Новая, являяся, аки служащая; радуйся, царевичу Алексие, суемудрыя студа исполняяй.
Радуйся, царевно Ольго, по покаянии любы благовествующая; радуйся, царевно Татиано, бремя немоты нашея молитвой облегчающая.
Радуйся, царевно Марие, моления детские исполняющая. радуйся, царевно Анастасие, радосте наедине предстояния Христу.
Радуйтеся, седмь, иже яко седмдесять толковников, истолкуйте ны благоприятие на Суде.
Кондак 10
Спасти хотя мир, иже всех Украситель, седмь убо таинств в Церкви своей положил есть: велию тайну предлагает Бога нам царственною седмерицею, за еже спастися Израилю Новому, останку Руси Святой, седми убо тысящам, не преклоньшим колена перед ваалами и астартами, седмерицею поюще: Аллилуиа.
Икос 10
Стена огустевших вод есть страдания ваша, мученицы царственные, мы же немокренно преходим житейское море, моляся вам, выну зря дугу седмицветную пред собою, Господеви поем: славно бо в вас прославися:
Радуйся, царю Николае, стено необоримая Церкви Христовой; радуйся, мира всего зло удерживаяй.
Радуйся, царице Александро Новая, защитнице российская; радуйся, царевичу Алексие, тепле кающимся целомудрие возвращаяй.
Радуйся, царевно Ольго, остененная всех дев стеной; радуйся, царевно Татиано, глас хлада тонка непщующим о царе.
Радуйся, царевно Марие, текущая на гроб России четверодневной; радуйся, царевно Анастасие, радосте нееманова седмеричная.
Радуйтеся, стены иерусалимския послепленныя, доме, иже создал есть Господь.
Кондак 11
Пение всякое наше побеждается пением вашим, иже яко седмь священницы с седмью трубы рожаны седмерицею обходите вознесенный оплот самозданной темницы нашей: аще ли не падет страстный сей иерихон? Мы же чающе свободитеся во Христа, поем: Аллилуиа.
Икос 11
Светоприемный седмисвещный светильник зрим мучеников царственных, седмь цветов радости послепотопной облиставающих нам: идеже преподобноцветен есть царь Николай, и в темнаго пурпура ризах Новая Александра-царица, мученик же царевич Алексий Димитрию-царевичу и Гавриилу Белостокскому цветом подобен, тамо голубицею царевно Ольга, и в небесных цветах царевна Татиано, иже благую часть избра, царевна же Мария златосиянно просвещает нас, и юнотка царственная Анастасия, яко пламень огненный: преклоньшие лица на землю, и боящияся, обаче поем сице:
Радуйся, царю Николае, чашу горькую в народа место испивый; радуйся, яко Пасха русская явился еси.
Радуйся, царица Александро Новая, верная России в Бозе даже до смерти; радуйся, царевичу Алексие, сострадание точащий.
Радуйся, царевно Ольго, еюже просвещает царь тьму нашу; радуйся, царевно Татиано, благословение домом.
Радуйся, царевно Марие, разстоящияся любовию сочетающая; радуйся, царевно Анастасие, радосте Всехитреца Господа.
Радуйтеся, седмь свещников огненных, горящих пред престолом Троицы Святой.
Кондак 12
Благодать дати восхотев преизбыточествующую шестью денми творит мир Господь, седмый же день благословляет, за еже освятити его: седмерица же царственная дадеся нам, во еже освятити людие свои покаянием, имиже новотворит Бог нас людие быти паки, иже сташа персть и гной, за еже спастися поюще: Аллилуиа.
Икос 12
Поюще коемуждо от вас, всякия беды и напасти, паче же уныния и отчаяния избавляемся, поюще же собору вашему, якоже соборне помазуемся елеем святым, аки певаемы от вас, мняще зрети вас сице:
Радуйся, царю Николае, всякое прошение исполняяй; радуйся, помощниче прежде прошения нашего.
Радуйся, царице Александро Новая, еяже слава вся внутрь есть и доныне; радуйся, царевичу Алексие, веры истинныя уверение.
Радуйся, царевно Ольго, на всякое время и час сходя в купель покаяния нашего; радуйся, царевно Татиано, яко во аде довлела есть ти любы Христова.
Радуйся, царевно Марие, елеоподательнице девам юродивым; радуйся, царевно Анастасие, манно веселия в пустыни житейской.
Радуйся, соборе елеофорный, помазуяй язвы наши седмерицею.
Кондак 13
О святыя седмь ветвей чудоточной Христовой лозы, яко седмь даров Приснопокланяемаго Духа Святаго точащия вам, от них же Духом Страха Божия аще ли не сияет нам царь Николай, и испускает лучи Духа Благочествия Новая Александра царица: Дух же Разума о Христе стяжавает для нас цесаревич многострадальный Алексий, Ведением светится Ольга, и Советом Татиана: Крепостию блистает Мария: Духа Премудрости каплет нам царевна Анастасия, целокупно же зримы суть седмь златых огней седмисвещника алтарнаго, просвещая и освящая поющих о вас: Аллилуиа.
Молитва
О освященный соборе святых мучеников царственных! Кийждо от вас непреложно есть изряднейший чудотворец и целебник: аще ли единаго от вас призываем во обстояниях, веруем абие спасены быти за любовь вашу ко Христу Богу нашему. Обаче тяжкие суть яко никогдаже прежде греховныя немощи наша: отступление наше аще ли не падение превратися: самая воля ко спасению уже поразилася, и не вемы, что есть спасение, довольнии есмы египетством нашим.
Темже, неспособнии принести истинное совершенное покаяние, изнемогшии телом и душею, не могущие исповедать срамные наши грехи, иные же и забвенние суть, паки же и исповеданные тяжкие грехи наша, от юности и от науки злы, доныне терзают совесть нашу, к вам вопием из глубины смрадной нашей темницы: о освященный соборе царственный! Веруем, яко седмочисленному составу вашему даде Господь Бог туюжде благодать, якоже и в таинстве елеопомазания: освятите убо молитвою вашею ны, немощные, отпустите греси наши и очистите совесть от всякия скверны: да облегчаеми предстательством вашим, впереди будем к небесным, идеже вы присно славите Безначальнаго Отца со Присносущным Его Сыном и со Пресвятым и Благим и Животворящим Его Духом, всегда ныне и присно, и во веки веков, аминь.
