Акафист Господу Иисусу Христу Грядущему
Кондак 1
Взбранный Воеводо и Господи, мipa Создателю, с верою и любовию припадающе к Тебе Грядущему, вопию Ти:
Иисусе, Господи Грядущий, вниди в дом души моея.
Икос 1
Ангелов лики со страхом и трепетом взирали на Тя, Господи, егда волею нас ради распялся ecu; мы же, грешнии, что возможем глаголати? Но дерзаем по слову Твоему молитися Ти:
Иисусе, Радосте наша, яви нам милость Твою;
Иисусе, Любы Неизреченная, даруй нам возлюбити Тя всем сердем и всем помышлением;
Иисусе, Желание наше, не отрини нас, ищущих Тя;
Иисусе, Свете Тихий, осияй нас светом Благодати Твоея;
Иисусе, Надеждо наша, не остави нас заблуждающихся;
Иисусе, вопрошающий нас - «Что творити вы на Земли?» даруй нам творити только Твоя повеления;
Иисусе, не возбранивый имети образ Твой, даруй нам выну имети образ Тя Грядущаго;
Иисусе, входящий в домы людей Твоих, вниди в мя и преобрази мя всего;
Иисусе, даруй ми разумети, что есть благая воля Твоя;
Иисусе, многомилостивый, не отступи от мене за нерадение мое;
Иисусе, Господи Грядущий, вниди в дом души моея.
Кондак 2
Вем, яко велие утешение имам в последовании Тебе, Господи, даруй ми николиже отступати повелений Твоих, да спасаемый Тобою зову: Аллилуиа.
Икос 2
Обещавый вечеряти с приемлющими Тя, соделай мя причастника вечери Твоея тайныя:
Иисусе, стоящий и толкущий у двери сердца моего, даруй ми уразумети зов твой;
Иисусе, призывающий нас ко очищению, даруй ми познати нечистоту мою;
Иисусе, Свете истинный просвяти мя, да возлюблю заповеди Твоея;
Иисусе, ищущий призвати грешных, отверзи слух мой, ко слышанию глагола Твоего;
Иисусе, утружденный на пути Своем, не имеющий где главу преклонити, не возгнушайся внити в дом мой;
Иисусе, вем яко наг есмъ, нищ и убог, но благодатию Твоею покрый мя;
Иисусе, Милосте безконечная, не остави мене немощного;
Иисусе, Врачу, исцели язвы страстей моих;
Иисусе, вся могий, коснися очес моих, во еже не видети мне суеты;
Иисусе, Премилостевый, очисти мя всего и спаси;
Иисусе, Господи Грядущий, вниди в дом душимоея.
Кондак 3
Глаголевый пречистыми устами Твоими: «Ей, гряду скоро, аминь». Даруй ми со возлюбленным учеником Твоим взывати: «Ей, гряди, Господи Иисусе!» Сего ради в трепете ожидая пришествия Твоего, зову Ти: Аллилуиа.
Икос 3
Призвавый апостолов от сетей рыбарских на служение Истине Твоея, призови и мя от суеты житеския, да последую Тебе с веселием и любовию глаголя:
Иисусе, простивый ученику Своему трикратное отречение, даруй ми его покаяние;
Иисусе, ни единым словом, но воззрением токмо на ученика Своего приведый его к Себе, даждь и мне слезы покаяния;
Иисусе, коснися души моея, да раскаюся о неправде моей;
Иисусе, взираяй на произволение сердечное, помилуй мя;
Иисусе, рекий апостолу Петру: «Гряди по Мне», повели и мне Тебе последовати;
Иисусе, глаголавый: «Блажен ecu Симоне вар Иона, яко исповеда Мя Сыном Божиим», - даруй и мне его исповедание истинное;
Иисусе, разрешивый сему ученику идти по водам во сретение Твое;
Иисусе, даруй и мне силу благодатную, не убоятися волн житейских;
Иисусе, простерший руку к Петру утопающему, простри и мне руку помощи;
Иисусе, рекий: «Кто не со Мною, тот против Мене», даруй ми пребывати всегда с Тобою;
Иисусе, Господи Грядущий, вниди в дом души моея.
Кондак 4
Возлюбивый, Господи, весь род человеческий, научи и мя возлюбити ближних моих, да просвещен и обожен Тобою, выну зову Ти: Аллилуиа.
Икос 4
Призываяй вся труждающиеся и обремененныя ко упокоению, даруй ми потрудитися ради имени Твоего святаго, не убоявшись зноя полуденнаго не ведаю бо егда день мой к вечеру приклонится, и да вопию Ти:
Иисусе, Свете святый, освяти повседневный труд мой;
Иисусе, Утешителю, даруй ми николи же возскорбети о тягости труда сего;
Иисусе, Радование мое, даруй ми понести всякую скорбь ради Имени Твоего;
Иисусе, научи мя познати образ Твой в каждом человеке;
Иисусе, Огнь попаляющий, попали мои злые помыслы;
Иисусе, совесте моя, даруй ми горько плакатися о гресех моих;
Иисусе, даруй ми возлюбити весь мip яко творение Твое;
Иисусе, смирение истинное, помози ми во смирении послужити страждущим;
Иисусе, благоухание жизни, облагоухай труд мой;
Иисусе, даруй ми познати Царствие Божие внутри себе;
Иисусе, Господи Грядущий, вниди в дом души моея.
Кондак 5
Се прихожду к Безсмертному Царю и Богу моему, со умилением вопия: Аллилуиа.
Икос 5
Вем, Господи, яко скорбями, недугами и различными печалями болезни - души наша врачуеши. Сего ради, взирая на многострадальную Землю нашу, где дерзкою рукою неверия Храмы разрушаются, святыя иконы оскверняются, исповедники веры умучиваются, со слезами вопию Ти:
Иисусе, Господи, Ты Сам гонимый из храмов Твоих, даждь нам силу терпети скорби за имя Твое;
Иисусе, Странником в мipe являющийся, помози нам во изгнании и странствии нашем;
Иисусе, Агнче Божий, вземляй грехи мipa сего;
Иисусе, Милостевый, возьми бремя грехов наших;
Иисусе, Пречудный, страдания за мip претерпевый, утоли наши многоразличные скорби;
Иисусе, Странниче в мipe утомленный, даруй покой утомленной душе моея;
Иисусе, учеников призвавый, даруй и мне небоязненно тещи за Тобою;
Иисусе, Господи Предвечный, Благослови всех к Тебе стремящихся;
Иисусе, Всеведующий, Ты веси, яко люблю Тя;
Иисусе, вся могий, помози ми и прости мя;
Иисусе, Господи Грядущий, вниди в дом души моея.
Кондак 6
Вем, Господи, яко тесными вратами и многими скорбями подобает внити нам в Царствие Небесное, тако укрепи стопы наша, да не возвратимся вспять мipoм побеждаемии, но да зовем Ти: Аллилуиа.
Икос 6
На вечери, в дому Симона прокаженнаго, не отринул ecu грешницу, пришедшую с миром многоценным помазати нози Твоя, но рекл ecu: Отпущаются греси ея мнози, яко же и возлюбила ecu много. Иисусе благий, реки и о моих гресех такожде, яко и аз грешный вопию Ти:
Иисусе, Пастырю добрый, призови мя яко заблудшую овцу;
Иисусе, Судие Праведный, Судом Твоим вразуми мя;
Иисусе, ими же веси судьбами спаси мя;
Иисусе, постивыйся в пустыне и напоследок взалкавый, даруй ми истинную жажду правды Твоея;
Иисусе, быв искушен всяческими, помози ми во искушениях моих;
Иисусе, рекий: «Не может человек творити ничесоже, аще не будет ему свыше дано»;
Иисусе, пошли ми помощь Твою с Небеси;
Иисусе, не уклони сердце мое в словесе лукавствия;
Иисусе, Помоще моя, помилуй мя;
Иисусе, Радование мое, спаси мя;
Иисусе, Господи Грядущий, вниди в дом души моея.
Кондак 7
Повелел ecu нам, Господи, быть мудрыми, искупующе время, яко дние лукавии суть и время сокращенно; вразуми мя, да спасаемый Тобою, вопию Ти благодарне: Аллилуиа.
Икос 7
Слыша Тайновидец апостол Иоанн Глас с Небеси глаголющий: «Напиши: блаженни мертви умирающие о Господе, ей, глаголет Дух, да почиют от трудов своих, дела бо их ходят вслед с ними». Слыша сии слова и аз ужасаюся - не имам бо дел ко оправданию и ничто же благое сотворих. Сего ради, от сердца вопию Ти:
Иисусе, Судие Праведный, не осуди мя по делом моим;
Иисусе, Премилостивый, виждь нерадение и зло содеянное мною;
Иисусе, Заступниче, помилуй и спаси мя;
Иисусе, не возгнушайся внити в оскверненный храм души моея;
Иисусе, Наставниче, научи мя покаянию;
Иисусе, Сыне Божий, даждь ми, нищему, Твое богатство неиждиваемое;
Иисусе, соделай мя рабом Твоим.
Иисусе, пусто изжих время многоценное, данное ми для спасения - прости мя;
Иисусе, приими мя, яко в единонадесятый час пришедшаго;
Иисусе, научи мя оправданием Твоим;
Иисусе, Господи Грядуший, вниди в дом души моея!
Кондак 8
Зриши, Господи, яко великою скорбию сердца человеческия исполняются от зла неверия во дни наши сущия; сего ради даруеши благодатное обновление икон святых в знамение обновления духа нашего, познав в сем всеблагое промышление Твое, благодарственно вопием Ти: Аллилуиа.
Икос 8
Дано бысть видение возлюбленному ученику Твоему, яко под алтарем избиенных за слово Божие и за свидетельство еже имеяху, возопиша гласом велиим, глаголюще: «Доколе, Владыко Святый и Истинный, не судиши и не мстиши крови нашея от живущих на Земли?» И дано быша коемуждо их ризы белы, и речено бысть им, «да почиют еще время малое, дондеже скончаются и братия их имущии избиены быти яко же и тии». Слышахом сие, возношу Ти скорбный глас мой:
Иисусе, Святый, утоли на Земли нашей скорби великия;
Иисусе, Праведный, укрепи любовию Твоею исповедников святыя веры, ныне люте страждущия;
Иисусе, по всей Земли Российстей проходящий, очисти ю Своими стопами;
Иисусе, утомленный на пути Твоем, укрепи народ Свой от глада и болезней погибающий;
Иисусе, Сам в нищете сый, укрый от хлада и нищеты братию нашу;
Иисусе, приими фимиам молитв святых в тайне Тебе подвизающихся;
Иисусе, ради сих праведных, помилуй нас;
Иисусе, вем яко видеши всякую каплю слез на очах наших;
Иисусе, вем, яко вместо разрушенных храмов на Земли Российстей воздвизаеши храмы нерукотворенныя на небеси;
Иисусе, созидаеши их из душ человеческих, ими же да украсится Царствие Божие;
Иисусе, Господи Грядущий, вниди в дом души моея.
Кондак 9
Возжелах просвещения Твоего, Господи, даруй ми, жаждущему, каплю благодати Твоея, да вопию Ти: Аллилуиа.
Икос 9
Ангельския силы, Серафимы и Херувимы и вся воинства Небесныя со страхом и благоговением взирают на великое смирение Твое. Ты убо, Господи Сил, Царю царствующих, Господь господствующих, смирив Себе, и зрак рабий приим по Земли нашей скорбной шествуеши из града в град, из веси в весь, всех созываяй Сам, на вечерю, Тобою уготованную, мы же слыша сие благодарно вопием Ти:
Иисусе, Благословенный, благослови всех призывающих Тя;
Иисусе, Благий, ко грешным пришедый, призови не ведающих Тя ко спасению;
Иисусе, не возбранивый детям приходити к Тебе, просвети детей невинных, в безверии воспитанных;
Иисусе, сохрани в тайном подвизе на всяком месте, в лесах и весях Тебе подвизающихся;
Иисусе, Великий Архиерею, иереев верных мученическую кончину Тебе ради приемлющих -укрепи светом благодати Твоея;
Иисусе, возсияй в сердцах гонителей, да познают Тя, Бога Истинного;
Иисусе, к великому всенародному покаянию нас призови;
Иисусе, Сострадающий нам, горе народное, глад, нужду, нищету и тьму духовную развей невечерним Светом Твоим;
Иисусе, призови и мя грешного ко спасению, не дерзающаго приступити к Чертогу Твоему;
Иисусе, просвети одеяние души моея, да вниду в Онь желанный;
Иисусе, Господи Грядущий, вниди в дом души моея.
Кондак 10
Ты рекл ecu Господи: «Побеждающему дам сидети со Мною на престоле Моем, яко претерпевый до конца, той спасен будет». Приемля сей глагол Твой сердце мое, в радости духовной, благодарственно вопиет Ти: Аллилуиа.
Икос 10
Увиде апостол Иоанн народ мног, его же исчести никто не может, от всякого языка, стоящий пред Престолом Божиим, и людей облеченных в ризы белы и слыша глас глаголющий: «Сии суть, иже приидоша от скорби великия и исправиша ризы своя и убелиша их в крови Агнца», сего ради вопием Ти:
Иисусе, Веселие Истинное, возвесели душу мою;
Иисусе, сподоби и мя послужити Тебе, якоже сии искупленнии от Земли служат Ти день и нощь в Царствие Твоем;
Иисусе, Творче мой, сотвори, да будет ми весь мip Храмом Твоим;
Иисусе, научи мя, да будет сердце мое престолом Тебе, и таинство жизни Твоея да совершается в нем;
Иисусе, услыши вопль и плач народа Русского;
Иисусе, Спасителю, приими от мене немощное славословие сие, яко жертву хваления;
Иисусе, во святом причащении Тела и Крови Твоея освяти мя;
Иисусе, даруй ми в терпении понести Крест свой;
Иисусе, Радосте моя, даруй ми, да в сердце моем благодарственно поклоняюся Ти;
Иисусе, вем, яко слышаще каждое воздыхание скорби нашея, приими ю во очищение душ наших;
Иисусе, Господи Грядущий, вниди в дом души моея.
Кондак 11
В немощи человека Сила Божия совершается: аз немощен и духом, и телом, но укрепи и ободри мя Благодатию Своею, да познав милость Твою, радостно воспою Ти: Аллилуиа.
Икос 11
Рекл ecu учеником Своим и всем верующим в Тя: «в мире скорбны будете, но скорбь ваша в радость будет». Вем убо, Господи, Тобою реченное и вопию Ти:
Иисусе, Свете Истинный, осияй страну нашу Российскую;
Иисусе, мир Твой даруй душе моея;
Иисусе, укрепи мя, да оставлю вся ради Тебе;
Иисусе, даруй ми узкими вратами приидти к Тебе;
Иисусе, Свете Тихий, уготовь сердце мое на вечерю Твою;
Иисусе, даждь ми все дни жизни моея послужити Тебе; Иисусе Спасе Благий, научи мя кротости и смирению, научи мя разумети нужду ближняго;
Иисусе, не хотению своему, но благой воле Твоея да последую;
Иисусе, скорби мipa сего во спасение да послужат ми;
Иисусе, Свете Незаходимый, просвети сердца народов во тьме неверия сущия;
Иисусе, Господи Грядущий, вниди в дом души моея.
Кондак 12
Умиленным сердцем и душею, радостию о Тебе исполненным, предстою пред Ликом Твоим, поклоняюся милосердию Твоему, воспевая Ти: Аллилуиа.
Икос 12
В горнице Сионстей на Тайной Вечере глаголал ecu учеником Своим: «мир оставляю вам, мир Мой даю вам, не якоже мip дает, Аз даю вам. Да не смущается сердце ваше и да не устрашается». Слышахом сие, реченное Тобою, вопию Ти:
Иисусе, укрепи мя на брань не с кровию и плотию, но с миродержателями тьмы века сего;
Иисусе, научи мя прияти вся оружия Божия;
Иисусе, да возмогу противиться врагу в день лют;
Иисусе, препояшь чресла моя истиною и облеки мя в броню правды;
Иисусе, обуй нози моя во уготование благовествования мipy;
Иисусе, научи мя восприяти щит веры и шлем спасения;
Иисусе, помози ми молитися на всяко время духом;
Иисусе, умудри мя пребывати бдящим во всяком терпении;
Иисусе, помози ми не угасити светильника души моея;
Иисусе, даруй ми внити в сретение Твое со светильником возженным;
Иисусе, Господи Грядущий, вниди в дом души моея.
Кондак 13
О, Иисусе Христе, Свете Тихий, осияй мя Истиной Твоею, да услышав зов Твой, со светильником горящим выйду во сретение Тебе, Грядущему, и молю Тя: вниди в дом души моея, да пою Ти: Аллилуиа, Аллилуиа, Аллилуиа.
Молитва
Господи, Иисусе Христе Сыне Божий, поклоняемся Пречистому Образу Твоему, Любви Твоея и Промыслу Твоему о нас, грешных и недостойных рабех Твоих. Услыши нас, Свете Истинный, мольбу и молитву с верою Тебе приносимую, и прииди к нам благодатию Духа Твоего Святаго, научи, умудри пребывати в Тебе, яко же Ты пребывавши в нас. Научи нас, Благий, молитве, добру и терпению, даруй нам дух сокрушения и дух покаяния. Отыми от нас, Господи Утешителю, дух праздности, дух уныния и неведения да оживем в Тебе.
О, Иисусе Христе Многомилостевый, Грядущий к нам! Помилуй нас и спаси, во времена сии скорбныя, молитвами Пречистым Твоея Матери, Архангелов, Ангелов, Апостолов и всех святых Твоих, от века Тебе благоугодивших. Аминь.
