Акафист преподобному Сампсону (Сиверсу)
Молитва Пресвятой Богородице «Всемилостивая»
Всемилостивая Владычице моя, Пресвятая Госпоже, Всепречистая Дево, Богородице Марие, Мати Божия, несумненная и единственная моя Надеждо, не гнушайся мене, не отвергай мене, не остави мене, не отступи от мене; заступись, попроси, услыши; виждь, Госпоже, помози, прости, прости, Пречистая!
Кондак 1
Избранный исповедниче пречудный, демонския рати сокрушителю, всехвально величаем тя, вернии чада твоя. Великий Старче наш, но яко имеяй велие дерзновение пред Христом Спасителем, воспеваем вси: Радуйся, Сампсоне Многострадальный, усердный исповедниче и дерзновенный молитвенниче.
Икос 1
Ангелом подобне всею жизнию своею проповедал еси веру православную, терпя узы и страдания до смерти, темже и мы благодарственно вопием ти сице:
Радуйся, о великий наш Старче;
Радуйся, новомучеников друже;
Радуйся, исповедников собеседниче;
Радуйся, страстотерпцев учениче;
Радуйся, старцев духовный брате;
Радуйся, иноков добрый отче;
Радуйся, Сампсоне Многострадальный, усердный исповедниче и дерзновенный молитвенниче.
Кондак 2
Видяще твое огнем сияющее преподобие, яко воистину достигл еси высот духовных и сонаследник Царствия Божия явился еси, о великий Старче, темже и мы твоими за ны молитвами, уповающе на Ходатайство твое, вопием Богу: Аллилуиа.
Икос 2
Разумев Божественная Писания, Божиею любовию от юности уязвився, пришел еси во обитель, жаждав постническаго жития и великаго подвига, и сподобился тамо Ангельскаго образа. Умоли даровати и нам ту́юже чистоту, юже и ты обрел еси; тебе же мы всехвально воспеваем:
Радуйся, града Петрова дивное украшение;
Радуйся, мерзостем мира лукаваго упорное противление;
Радуйся, терзаниями от слуг антихристовых Творца прославивый;
Радуйся, новых ересей огненный обличителю;
Радуйся, свирепым богоборцам мужественный противостоятелю;
Радуйся, Свято-Александро-Невския Лавры достойный наследниче;
Радуйся, Сампсоне Многострадальный, усердный исповедниче и дерзновенный молитвенниче.
Кондак 3
Силою Христа Спасителя дерзновенно прошел еси вся узы и муки, и смерти, низвергая богоборцев силою молитвы, сокрушил еси козни вражия, победительно воспевая Богу: Аллилуиа.
Икос 3
Имеяше крылия невещественныя, предстательствовал еси о многострадальном Отечестве нашем и о Соловецких исповедниках, от богоборцев убиенных; с ними же и ты был еси, терпеливо неся крест свой сквозь узы и тесноту, и страдания, и убиения; помня о сем, вопием ти таковая:
Радуйся, юных подвижников в вере твердо примером своим укрепивый;
Радуйся, Соловецких исповедников послушнейший и тихий брате;
Радуйся, в тяжких муках непреодолимая высото смирения;
Радуйся, среди крыс, людей ядущих, чудно выживший;
Радуйся, благоуханный цвете благодати, во мраце безчестия дивно процветший;
Радуйся, братьев заключенных и убиенных прекрасное величание;
Радуйся, Сампсоне Многострадальный, усердный исповедниче и дерзновенный молитвенниче.
Кондак 4
Бурю внешних нестроений, расколов и ересей пред очима имея, покой внутридушевный молением ко Всемилостивей обрел еси, прошел еси все житие свое, преподобне, и услаждаяся от молитвенного делания и чистоты, подвизался еси непрестанно пети: Аллилуиа.
Икос 4
Слышана бысть весть о скорбных страданиях твоих, егда ввержен был еси в узилище, Старче наш Сампсоне; чудным водительством Богоматере победу над смертию имел еси и сохранен был еси для нашего вразумления, темже мы со умилением вопием ти:
Радуйся, велия откровения от Матере Божией сподобивыйся;
Радуйся, безбожных, злых и неведящих милостивый вразумителю;
Радуйся, пустынный житель и в телеси Ангел;
Радуйся, силою Христа вырвавший смерти безжалостное жало;
Радуйся, логовища бесов пустыни Киргизския мужественно прошедый;
Радуйся, в бездне страдания велие смиренномудрие показавый;
Радуйся, Сампсоне Многострадальный, усердный исповедниче и дерзновенный молитвенниче.
Кондак 5
Боготечной звездой явился ты еси средь безчисленнаго сонма Россистех исповедников новаго времени, мы же благодарно в страсе Божием Всехвальному Богу вопием: Аллилуиа.
Икос 5
Видяще в тебе, отче, светозарное блистание всех добродетелей, явленных в тяжцех гонениях, коим ты подверглся еси от властей нечестивых в земли Ставропольския, взываем ти со умилением:
Радуйся, в сердце твоем память о Господе всегда имевый;
Радуйся, народом простым за мудрость Божию возлюбленный;
Радуйся, юношей и дев в вере Православней воспитателю;
Радуйся, тайных христиан духовный наставниче;
Радуйся, пошатнувшуюся веру в земли Кубанския возродивый;
Радуйся, от злых гонителей в бочке тайно увезенный;
Радуйся, Сампсоне Многострадальный, усердный исповедниче и дерзновенный молитвенниче.
Кондак 6
Проповедннк Истины был еси, Старче наш Сампсоне Многострадальный, указуя краткий путь к вечному спасению, подвиги имея пречудныя, и показав собою образ истиннаго монашества, учил еси нас воспевати Божественную песнь: Аллилуиа.
Икос 6
Воссиял еси в Мордовстей земли яко несравненный светильник Старчества духовнаго, приводя ко спасению многих и в вечной памяти народа сего любовию бережно xранимый; мы же, зная сие, благодарственно воспеваем ти:
Радуйся, всех черных жаром подвигов возжегший;
Радуйся, немощных и оглашенных огненною молитвою запаливший;
Радуйся, пытки и мучительства от злодеев смиренно перенесший;
Радуйся, бесов из одержимых добрый изгонителю;
Радуйся, всех православных христиан столпе и единителю;
Радуйся, земли Мордовския с ея народом-исповедником покровителю;
Радуйся, Сампсоне Многострадальный, усердный исповедниче и дерзновенный молитвенниче.
Кондак 7
Хотя оградити веру православную от неверия, был еси пастырь добрый пастве, тебе Господом врученной, зря козни вражия, не оставлял еси овцы верныя, защищая их от лютых демонов, и пред ними равноангельски подвизался еси во всеоружии Креста и Истины, поя Богу: Аллилуиа.
Икос 7
Новый дерзновенный молитвенниче явился еси пред Богом, Старче преподобне, и своею кротостию, чистотою и исповеданием повергл еси козни диавольския, чрез людей на тя возводимыя; мы же, видяще твое незлобие, с любовию воспеваем ти:
Радуйся, монашеския радости чрез подвиги обретый;
Радуйся, в молитве и плаче нощи проводивый;
Радуйся, светильник веры живой из-под спуда неверия возсиявый;
Радуйся, в местах служения своего всех ревностию о Бозе воспламенивый;
Радуйся, еретиков, нечестивцев и пособников боговорцев верою несумненною поборивый;
Радуйся, непрестанныя поношения и гонения кротко претерпевый;
Радуйся, Сампсоне Многострадальный, усердный исповедниче и дерзновенный молитвенниче.
Кондак 8
Странны и великочудны суть слышащим житие и подвиги, тобою совершаемыя, Старче наш Сампсоне, егда ты, яко твердый воин Христов, дерзновенно воздвизал еси на брань со страстьми вся, тобою ведомыя, победно воспевая Богу: Аллилуиа.
Икос 8
Весь исполнен был еси любве Христовей к чадам духовным и братиям обители, егда священноначальницы и братия хулиша и оскорбляша тя зело, искусившись на клеветы: обаче никая мерзость приражашеся ти, всеблаженне, яко не возможе тьма мира объяти просветивый тя свет Христов; приими же от нас приносимыя хвалы сия:
Радуйся, в Псково-Печерския обители меж всеми всесверкающий адаманте благочестия;
Радуйся, монахов и мирян высотою духа изумивый;
Радуйся, великими старцами обители любимый и равный им;
Радуйся, о всех предстательствующий и к покаянию приводящий;
Радуйся, три дни от земли восхищенный и об обители умоливый;
Радуйся, клеветы и поругания смирением в прах обративый;
Радуйся, Сампсоне Многострадальный, усердный исповедниче и дерзновенный молитвенниче.
Кондак 9
Всякое естество Ангельское и человеческое дивится страшному житию твоему святому, о Богоносне отче наш Сампсоне! Всякия муки, лишения и болезни кротко претерпел еси, спасения ради земли нашея; тем сугубым венцем увенчан на Небесех, с лики святых славяще Бога и веселяще всех, усердно к помощи твоей притекающих, Богу же вопиющих: Аллилуиа.
Икос 9
Вития мира затворяют уста своя, зря всечудную силу Духа Святаго, обитавшего в тебе, Старче наш Сампсоне; ты же сиянием сим освещаеши мрак душ наших и спасаеши нас; мы же, радующеся, приносим ти похвальную песнь сию:
Радуйся, града Москвы в Духе Божием обновление;
Радуйся, всем алчущим Истины чистых вод источниче;
Радуйся, нас слепых чуткий поводырю;
Радуйся, греха чистилище, падшими не гнушавыйся;
Радуйся, козни бесовския постом испепеление;
Радуйся, истиннаго Православия пламенное утверждение;
Радуйся, Сампсоне Многострадальный, усердный исповедниче и дерзновенный молитвенниче.
Кондак 10
Спастися жаждущим в попранном Отечестве нашем достойный вождь был еси, о всеблаженне отче, и непоколебимый столпе всем притекающим к тебе явился еси, сохраняя стадо Христово от лжеучений и ересей. Мы же, храня в сердце поучения твоя, вслед идем молитвами твоими, с любовию воспевая Богу: Аллилуиа.
Икос 10
Стена несокрушимая Церкве явился еси, преподобне отче Сампсоне, житием своим подвизая нас на подвиги и молитвами твоими избавляя от пагубы всех, к тебе притекающих; темже благоговейно взываем ти:
Радуйся, Великаго Ангельскаго образа достойный носителю;
Радуйся, рати демонския в единоборстве сокрушителю;
Радуйся, в скорбех и болезнех непрестанное благодарение Богу приносивый;
Радуйся, трижды умерый же и воскресый;
Радуйся, сугубо заботы преподобнаго Серафима сподобивыйся;
Радуйся, покров Всемилостивей Госпожи Богородицы стяжавый;
Радуйся, Сампсоне Многострадальный, усердный исповедниче и дерзновенный молитвеннике.
Кондак 11
Пение непрестанно приносимое ти, Старче великий, приими и помози дерзновенно рабом твоим верным, ибо веруем: жив исповедник многострадальный и по смерти, во веки поя Христу: Аллилуиа.
Икос 11
Светильниче Христа Спасителя и непобедимый поборниче чистоты Православия явился еси, о великий Старче наш Сампсоне, восприяв преподобие Святых Отцев; научи, преподобне, вечно пети житие твое победоносное:
Радуйся, огненный мечу Православныя веры;
Радуйся, молитвы Иисусовой духоносный учителю;
Радуйся, смиренный насмертниче Спасителя:
Радуйся, благодатный витязю Христов;
Радуйся, Церкве Россистей Православней непоколебимый столпе;
Радуйся, чертогов райских достойный насельниче;
Радуйся, Сампсоне Многострадальный, усердный исповедниче и дерзновенный молитвенниче.
Кондак 12
Благодати Божией преобильное вместилище явился еси, преподобне, и источниче воды живой, напояющий верою всех притекающих к тебе, отче наш Сампсоне, ибо вся возможна предстательству от Господа, тебе Дарованному, егоже стяжавше, ныне ликуеши на Небесех, воспевая Богу: Аллилуиа.
Икос 12
Поюще твое всеславное житие, имже просиял еси, Старче Сампсоне, исправляя недуги душ и телес наших, по отшествии же твоем в Горнее Царствие вся воздвизая притекати к твоему заступлению, благодарнии людие приносят ти таковое пение:
Радуйся, святителей тайный духовниче;
Радуйся, монашествующих славное похваление;
Радуйся, изнемогающих и отчаявшихся крепкое ободрение;
Радуйся, пастырей ненавязчивое вразумление;
Радуйся, мирян добрый и дивный пастырю;
Радуйся, и по смерти к себе приводяй;
Радуйся, Сампсоне Многострадальный, усердный исповедниче и дерзновенный молитвенниче.
Кондак 13
О, Сампсоне, великий Старче досточудный! Услыши малое сие моление наше и умоли Пречистую и Преблагословенную Матерь Божию покрыти нас омофором милости Ея, да возможем внити в Царствие Небесное и вечно воспевати Богу: Аллилуиа.
Молитва
О, Сампсоне Многострадальный, исповедниче новаго времени, молим тя, мы недостойнии: испроси у Всемилостивыя Госпожи Богородицы, возлюбившия тя, покров и спасение нам, ибо ты сподобился еще на земли грехи отпускати, души врачевати, бесы изгоняти и великия чудотворения творити; умоли Всепречистую Матерь Бога нашего чистоту веры нам даровати. Церкви нашей Православней пастырей возставити, души наша уврачивати, бесов изгоняти, помрачения наша просветити. В час испытания веры нашей дар мужества нам подати, да последуем стопами чуднаго святаго жития твоего и сподобимся с тобою Царствия Небеснаго, дабы и мы со всеми святыми прославляли пречестное и великолепое Имя в Троице славимаго Бога: Отца и Сына и Святаго Духа. Аминь.
