МОЩИ СВЯТЫХ
| СОДЕРЖАНИЕ |
Андрей Смоленский, благоверный князь.
Сказание об обретении Мощей Святого
Бывшу некогда преподобному Даниилу на Москве, и воспомяну Самодержцу о состаревшихся церквах близ врат града Переславля, дабы велел новыя поставити. церковь святого и великого пророка иоанна Предтечи, у нея же придел великомученицы Варвары, и другая церковь великого чудотворца Николая. еже и повеле царь новыя церкви поставити. и тогда преподобный Даниил поведа царю и великому князю иоанну Васильевичу и преосвященному иоасаѳу митрополиту, есть. рече. у церкви святого чудотворца Николая, о ней же поведах. яко состарелася, и ту лежат мощи в земли, чудна мужа и свята князя Андрея Смоленского, его же никто же помняше, мы же не пред многими леты своима очима видехом. память ему сотворяему во храме. в немже мощи его почиваху. и службу ему совершаему, и стихеры, и канон ему певаемый. и на иконах образ его написуем, и с верою приходящии к мощем его, призывающе в молитве того святого князя Андрея, не отхождаху тщи, но приимаху яже на пользу прошения, ныне не вем. чесого ради таков свят муж ни от кого поминаем. И сего ради возвестих Вашей Державе, бояся, да не конечному забвению предастся таковое дело, и аз да не буду молчания ради осуждению повинен.
Царь же и первосвятитель рекоша, что сотворим о сих? Старец же, уповая некоим от Бога извещением, рече: аще повелит держава ваша, и в Переславли да соберется собор священный, и да помолят Бога, и премилостивый Бог ради Твоея царския веры и благословением первосвятителя, и молитвами всесвященного собора, да явит нам Бог мощи раба своего, хощу уповая на Бога и на молитвы раба его, искати сих. И повелеша ему сия дерзати. Глаголют же о сем князи Андреи в повестех нецыи сице, аще истинна суть. един Бог весть, яко сей бяше един от Смоленских князей, и за некую крамолу и братоненавидением, утаився своих си, оставив княжение, дом и отечество, изыде от града Смоленска и в Переславль прииде. и ту никимже знаем, и странствовавше Христа ради, и пребысть у церкви святого Николы. пономарствуя и труждаяся. яко един от убогих, лет яко тридесять, претерпевая всяко оскорбление и нужду, и никтоже ведяше, кто есть, или откуду прииде. И егда преставися от жития сего к Богу, нецыи глаголют. тогда обрели у него писание, яже о нем. и чепь злату, и перстень злат, и от того писания уведаша, яко князь есть Смоленский, и златую его чепь и перстень глаголют взял князь великий иоанн Васильевич, и за сие дал ругу к церкви святого Николы. яже есть и до ныне, писание же то ныне не обретается, еже о нем, разве токмо стихеры и канон.
И пришед Даниил в Переславль. И возвести царское повеление и святительское благословение священному собору, еже о взыскаши мощей князя Андрея. и всем любезно бысть, и хотеша звонити, да народ увесть. и некто от собора рече: аще угодно Богу явити мощи раба своего. то без звону молебная певше. идем над мощи, и от сего увемы. аще приятно будет дело сие Богу, и угоднику Его. и тако само дело возопиет, и аще кому известит Бог, и той самозван да приидет. и угодно бысть слово сие Даниилу и прочим. и вшедше в соборную церковь. молитвовавше, идоша к церкви святого Николы. и молебная отпевше, изыдоша над мощи, и храмину, яже над мощми, разобраша, и начаша копати. и снидеся народ безчисленное множество. священнического и иноческого чина, и от вельмож, граждане же и поселяне мужеска полу и женска, от малых до великих, никимже зовоми, со умилением и со слезами, и со свещами. Даниил же прилежно Бога моляше, и от очию слезы непрестанно испущаше, и нищих милостынею удовляше, и обретоша мощи не во гробе, но скалами берестовыми обвиты и около его множество гробов исполнены костей человеческих.
Он же ничимже не врежден, ниже смесися с иными костьми, аще и вкупе лежаху мощи же его яко мѵром облияны видяхуся, яко благоухание некое испущающе. и вси радости исполнени бяху зряще нань, власи же бяху главнии русы и велицы и цели бяху, и яко свет светяхуся, и ризы его, в них же Бога ради препроводи житие, в сих же и погребен бысть, и обретошася сверху главы и до ногу, на едину страну яко скутаны бяху, на них же бяху и пугвицы медяны. мощей же не двигнуша. дондеже известят святителю. и егда отгребаху от мощей землю, в ней же бяху и крупицы многия береста оного, имже быша мощи обвиты, и тыя крупицы мнози недужнии взимаху и исцелеваху, народи же дивляхуся и славляху Бога.
И вскоре посла Даниил священника к святейшему митрополиту известить, како изволит сотворити. яже о обретении мощей. Митрополит же возвести сие царю и великому князю иоанну Васильевичу всея России. И послаша освященных избранных мужей — Чудовского архимандрита иону, сановита суща. иже последи бысть епископ Суждалю, и Успенского собора протопопа Гурия, мужа нарочита и благоговейна, видети мощи и устроити о них по достоинству. яко же лепо быти. Они же в Переславль пришедше и в соборной церкви молебная певше, приидоша к церкви святого Николы. и с ними безчисленное множество священнического и иноческого чину, и от вельмож, и народа людей, паче первого, мужеска полу и женска. и всякого возраста. и мощи видевше, и над мощми панахиду певше. Чудовский архимандрит иона. яко истязуя, вопрошаше Даниила: коея ради вины взыскал еси мощей сих и от кого повеление взем? Даниил же рече: известих сие благочестивому царю и преосвященному Митрополиту, ея же ради вины повелено ми бысть от них, и все сие явственно. ныне же паче благоволи Бог вашему великому священству своима очима видети святого сего. се образ его зрите на иконе написан, такожде и служба ему же стихеры и канон в старых книгах писано. не от мене сие изложено, ни мною повелено, но вельми прежде мене, и вопрошайте народа, чтó видеша, и недужнии како исцелеша, и от сих уразумевайте.
